ඉස්කෝලෙ යුද්ධය

අගෝස්තු 29 සදුදා රෑ 8.21 

ගොඩ කාලෙකට පසු බ්ලොගියේ කුනු දූවිලි ගසා දමා ටෙම්ප්ලේට් එකද හැඩ කලෙමි. ඊයෙ රාත්‍රියේ මට අලුතින් මිතුරන් කිහිප දෙනෙක්ම මුන ගැසිණි. ඒ අතර හැලප කඩේ (මගේ වයසට සරිලන අයුරින් "හැලප අංකල්" ඇයි ඇමතීම යෝග්‍ය යැයි සිතමි.) ගුරුවරියකගේ මතක සටහන්, ඉවාන් පවුලූශා වේ.

මමද හැමදාම පොත් ගැන කිය කිය ඉන්නේ නැතිව මගේ ජීවන අත්දැකීම් ඔබ හා බෙදා ගන්නට සිතුවෙමි. මෙදා නිවාඩුවේ අන්තිම දින කිහිපයේ සිට ලියන මේ ලිපියේ සිට මා මෙලොවේ ගතකල අවුරුදු 12 ගැන හොද හොද කතා ඇසීමට ඔබට හැකිය. මම ඉපදුනේ හැදුනේ වැඩුනේ ගාල්ලේය. 

ගාල්ලේ යැයි කිව්වාට හරියටම මාගාල්ලේය. මාගාල්ලේ සම්පූර්ණයෙන්ම ඇත්තේ ධීවර පරිසරයකි. මාගාල්ලට අමතරව ගාල්ල නගොඩටද මකරා ගේ සම්බන්ධතා ජාලය පැතිරී තිබේ. මකරා වූ කලී සයිබර් රංග භූමියේ තවත් එක් චරිතයක් පමණි. 

එහෙත් ඒ චරිතයට පණ පොවන නලුවා වූ කලී කුඩා කොලු ගැට්ටෙකි. ඒ කොල්ලගේ පාසලේ සිදුවු තෙවන ලෝක යුද්ධය ගැන අද ඔබට දැන ගැනීමට හැකිය. 
පදුර වටේ තැලීම අවසානයි. දැන් ආපු කාරණේට බහිමු. 

එතකොට මකරාට වයස අවුරුදු 9කි. ඉගෙන ගත්තේ සහ තාමත් ගන්නේ ගාල්ලේ හොදම පාසලකය. මකරා එතකොට 5 වසරේය. එකල 5 වසර වූ කලී ප්‍රාථමික අංශයේ ළමා පාතාලය රජ කල සහා තාමත් කරනා තැනකි. “සිස්සත්වෙට” සූදානම් වන්නෝ ද එමටය. ඒ අතර පාතාලේ මැර ක්‍රියාද අඩුවක් නැතිවම සිදුවන්නේය.

 එකල එහි 5 වසරේ තවත් එක් භීතියක් පැතිර ගියේය. එයනම් “බුලට්” භීතිකාවයි. එකල 5 වසරට රබර් පටි වූ කලී තහනම් ද්‍රවයයකි. පන්ති 5ක් තිබූ පහ වසරේ පන්ති අතර සිදුවන මැර ක්‍රියාද එමටය. මකරා සිටියේ E පන්තියේය. E පන්තියේ ජන්මාන්තර වෛරක්කාරයන් වූයේ B පන්තියයි. 

B පන්තියට අනවසරයෙන් ඇතුල් වූ E පන්තියේ "බුලට්" සොල්දාදුවන් පිරිසක්. ඡායාරූප අනුග්‍රහය - ගූ ගලේ

මකරා වූ කලී වෙනස් විදිහටම හිතන්නෙකි. E පන්තියේ මැර වර සෙට් එකේ මකරාට ස්ථානයක් නොවීය. මකරා වූ කලී සාමාන්‍ය ළමයෙකි. "බුලට්" වලින් විදගනිමින් සිදු වූ මේ සටන් ජවනිකාව රූගත කලා නම් "හොද චිත්‍රපටයක්" පවා සාදා ගැනීමට පුලුවන් වෙයි. 

පිරිසක් සටනට අවශ්‍ය "බුලට්" සාදයි. තවකෙක් සටනට අවශ්‍ය යුද උපක්‍රම යොදා ගනිමින් සිතියමක්ද පිලියෙල කරයි. කෙසේ හෝ මේ පාතාල ක්‍රියාකාරකම් අවසන් වූයේ මුලු පන්තියම යහමින් “ඉල්ලා ගත්තාට” පසුවය. එකල එහි පාලනය ගෙන ගිය ගුරුවරුන් වූ කලී දෙවිවරුන්ය. 

එකල එහි වූ ළමා පාතාලය අවසන් වූයේ අවුරුදු 5ක් ම එකට සිටි අය 6 වසරේ දී පන්ති වලට බෙදා යැවීමෙන් පසුවයි. නමුත් වාසනාවකට මෙන් තවමත් මකරාත් මකරාගේ හොදම මිතුරාටත් වෙන් වී මට සිදු වී නැත. 1,2,3,4,5,6,7,8, මේ අවුරුදු 8 දීම අප දෙදෙනාට වෙන් වී මට සිදුවී නැත. 

9 වසරේදීත් වෙන් නොවී සිටීමට හැකි වේ යැයි පතමි. ඔහුද මකරාට සරිලනම මිතුරෙකි. තවත් හොදම මිතුරෙක් සිටී. ඔහු මට මුන ගැසුනේ මකරා "මොන්ති‍තෝලි" යන දවස් වලය. තවමත් මේ මිතුරන් දෙදෙනා මකරා සමග යහතින් සිටී. ඔවුන් ගැන රස කතා පසුව බලාපොරොත්තු වන්න. 

ප.ලි. මෙම ලිපිය මගින් කිසිවෙකු අපහසු තාවයට පත්වූයේ නම් සමාව ඉල්ලා සිටින අතර මා මෙය පල කරේ මගේ ජීවන අත්දැකීමක් ලෙසය.